اؤزسایغی و اؤزگۆون نه‌دیر؟
اؤزسایغی(حرمت نفس) و اؤزگۆون(اعتماد به نفس) نه‌دیر؟
حاضیرلایان: میلاد بالسینی
اؤزسایغی یا همان حرمت نفسین چوخ مختلف تعریف‌لری واردیر. بو تعریف‌لرین اورتاق نقطه‌سی اؤزونه سایغی دویماق و ده‌یر وئرمکدیر. یانی اؤزونو سئومک، اؤزونه سورکلی بیر حالت ده شفقت‌لی داورانماق، اؤزونو سایماق، اؤزونه اولویت وئرمک و اؤز احتیاجلارینی قارشیلاماقدیر.
شخص اؤزونو یاخجی باشا دوشمکله ایلگیلی بیر مفهوم اولان اؤز سایغی، اؤز گوجلو و ضعیف ابعادلارین اولدوغو کیمی قبول ائتمک، اؤزونو ده‌یرلی گؤرمکدیر. هم اینسانین اؤزونه اورجینال بیر فرد اولاراق ده‌یرلی، هم ده قارشیلاشدیغی سورونلارلا باشا چیخا بیله‌جک قدر یئترلی حیسس ائده‌بیلمه‌سی اولان اؤزسایغی؛ اؤزونو بؤیوک اؤلچوده اعتیبارلی بیر جایگاها گتیرمکدیر. یانی شخصین گوجلو و ضعیف ابعادیلا اؤزونون فرقینده اولماسی و وار اولان ابعادیلا اؤزونو ده‌یرلی گؤرمه‌سی، اؤزسایغی‌یلا ایلگیلی ایکی آنا عونصوردور.
دهیرلیلیک و یئترلیلیک و یا همان لیاقت‌لی اولما دویغوسو، اؤزسایغینین تملینی اولوشدورور. شخص بو دویغولاردان بیرینی بئله یئترینجه حیسس ائده بیلمه‌ینده، یاشامدان آلدیغی دوْیوم و یا همان خشنودی آزالار و اؤزونو سئومز. چونکو شخصین یئترلیلیک دویغوسو گلیشمهسه مسئولیت لر و یا همن سورونلار قارشیسیندا دا یئترسیز قالار؛ دهیرلیلیک دویغوسو گلیشمهسه ده اؤزگون بیر بیرئی کمی حیسس ائده بیلمز، هابئله اؤزونه لاییق اولدوغو ده‌یری ده وئرنمز. آنجاق دهیرلیلیک و یئترلیلیک دویغوسوندان هر ایکیسی ده یئترینجه گلیشمهسه یاشام او شخص اوچون تام بیر کابوس اولا بیلر. بو دورومدا شخص اؤزونو باشقالاری‌یلا توتوشدوروب، اونلار کیمی اولا بیلمهمک، اونلار کیمی ایشلری یئرینه یئتیره بیلمهمک اوچون اؤزونو تحقیر اولونموش گؤرر.
گئنللیکله اؤزسایغی مفهومونون اؤزگۆون مفهومیلا عئینی معنیسی داشیدیغی دوشونولور. چئوره‌نین شخص حاققینداکی گؤروش و بازخوردلاری اؤزگۆونی اولوشدورور. اؤز سایغی دا شخصین اؤز حاققینداکی ده‌یرلندیرمه‌لری سؤز قونوسودور. بیر باشقا دئییشله اؤزگۆون چئوره‌ده‌کی‌لرین شخصی نئجه گؤردویویله ایلگیلیدیر و شخصین اؤزونو سئویب_سئومه‌مه‌سی، باشقالارینین اونو ده‌یرلندیرمه‌سینه باغلی قالیر.
اؤزگۆون شخصین اؤزونه، اؤز ذئهنینده اولوملو و یئترلی آلقیلاماسی و یا اؤزو حاققیندا اولوملو ایچ تاساریملارا یییه‌لنمه‌سی اولاراق قبول ائدیلیر. یانی بیر جور ایچ باریش اولان اؤزگۆون، شخصین یئتنکلرینی، سینیرلارینی، ظرفیتینی بیلمه‌سی و بو بیلگینی عمله کئچیره بیلمه باجاریغی اولاراق دا قبول ائدیلیر.
اؤزگۆون راحات گلیشمز. شخصین یاشادیغی تجروبه‌لر، بو تجروبه‌لرین سونوندا قازاندیغی باجاریقلار و مهارتلر اؤزگۆوهنی گوجلندیریب و یا ضعیفله‌در. شخص باجاریقلارینی بیر یئتنک و مهارت حالینا گتیره بیلدییی، بیله بیلدییی و گؤردویو ایشین اوزه‌رینده کونترول ساغلادیغی اؤلچوده اؤزونه گووه‌نه‌جکدیر، و یا گۆوه‌نه بیلمه‌یه‌جکدیر. حالبوکی اؤزسایغی شخصین اؤزو ایله قوردوغو ایچ اۆنسیّتین یانسیماسیدیر. بو ایچ اۆنسیّت اولوملو دینامیک ایسه اؤزسایغی دا عئینی پارالئللده اولاجاقدیر. چونکو اؤزسایغی اؤزونو قبول ائتمه‌یه باغلیدیر. اؤزونو و سینیرلارینی قبول ائتمک‌دیر. شخصین اؤزونو نئجه گؤردویویله ایلگیلیدیر. کارل گوستاو یونگ؛ “موتلو اولماق ایسته‌ییرسن سینیرلارینی تانی و اونلاری قبول ائت دئمیشدیر.” اؤزسایغی، اینسانین اؤزونه اولدوغو قدر، باشقالارینا و یاشادیغی حایاتا سایغی دویماسینی گرکلی قیلدیغی اوچون گلیشدیریلمه‌یه و یوکسلدیلمه‌یه نیاز دویار. شخص وئردییی ده‌یری آرتیرار، بیلگیسینی چوخالدار، قایناقلاریندان قوللانماغی اؤیره‌نر و حایاتی دوست و آنلاملی اولاراق قاوراماغا باشلارسا اؤزسایغی دا عینی اؤلچوده آرتار. اؤزسایغی شرطسیز اولدوغو سوره‌جه شخصین اؤزگۆوهنی یوکسکدیر.
اؤزگۆون اوچون اؤزسایغی، ده‌ییشیلمز شرطلردن بیریسیدیر. اؤزسایغی اؤزگۆوهنی دوغورار. آنجاق آشیری اؤزگۆوه‌نه یییه‌له‌نن شخص‌لر منلییینی شیشیرده‌رک گئرچکلیکدن، دوغاللیقدان اوزاقلاشاراق اؤنملی اؤلچوده شخصیت و داورانیش سورونلاری یاشایا بیلرلر. زامان_زامان شخصین آنلامادیغی، کونترول ائده بیلمه‌دییی، دوروملاردا یئنیلمیش و یا همان مغلوب قالماسی، اؤزونه گووه‌نه بیلمه‌مه‌سی نورمالدیر؛ بورداکی اؤزونه گۆونمه‌مک اولومسوز دئییل، اولوملو بیر دورومدور. بو دورومدا اؤزگۆوهنی اولان شخص اؤزونو یئترسیز حیسس ائده بیلر. آمما آشاغیلیق عقده‌سینه قاپسانماز. آشاغیلیق دویومو، اؤزسایغیسی و اؤزگۆوهنی آز و یا اسکیک اولان شخص‌لرین یاشادیغی روحسال بیر دورومدور.
ممکن است به این موارد نیز علاقه مند باشید:
آزمون آنلاین
0 دیدگاه در “اؤزسایغی و اؤزگۆون نه‌دیر؟”